CEBU, Philippines - Gitataw sa hepe sa Cebu Provincial Health Office (CPHO) nga mas nakabintaha ang rehiyon 7 ilabi na ang lalawigan sa Sugbo sa kusog nga pamakuna batok tipdas hinungdan nga di kaayo daghan ang nataptan sa maong balatian dinhi.
Gibutyag kini ni Dr. Cynthia Genesolango, hepe sa CPHO nga mikabat og 87 porsento sa katibuk-ang molupyo sa lalawigan sa Sugbo ang nabakunahan batok tipdas sa tuig 2013.
Hinungdan nga may 61 ka kaso (clinical cases) sa tipdas gikan sa Enero 1-18, 2014 ang natala sa listahan sa Department of Health (DOH)7.
Atol sa AGIO Forum didto sa buhatan sa Phil. Information Agency (PIA)7 gibutyag ni Genesolango nga nasuta nila nga ang paghugpa sa sakit nga tipdas didto sa National Capital Region (NCR) nagumikan sa menus ang gidaghanon sa ilang nabakunahan batok tipdas.
Matud pa ni Genesolango nga way laing makasumpo niining sakita gawas sa bakuna nga gitanyag sa kagamhanan nga libre ngadto sa tanan.
Hinuon ang lalawigan s a Sugbo wala makakuha sa 95 porsento nga target sa DOH nga bakunahan batok tipdas tungod kay daghang mga inahan ang wala magpakabana sa pagdala sa ilang mga anak ngadto sa mga barangay health center sa ilang mga lugar. Matud pa ni Dr. Maria Socorro Entera , hepe sa maternal and child health sa DOH 7, nga human nila masuta nga daghang mga ginikanan ang wa kaayo magtagad sa pagpabakuna sa ilang mga anak, ang mga barangay health worker (BHW) mao nay mosuroy ngadto sa kabalayan sa mga molupyo.
Midugang si Entera nga ang bakuna batok tipdas maoy bugtong sulusyon niining paghugpa karon didto sa kaulohan sa maong sakit. (BANAT NEWS)