Managemant plan sa CRRDMC aprobado na

CEBU, Philippines - Giaprobahan sa kagamhanan  sa dakbayan  sa Talisay  ang P29.5 milyones nga budget sa City Risk Reduction Disaster and Management Council (CRRDMC) sa maong  dakbayan alang sa management plan niining tuiga.

Si Talisay City Public Information Officer ug chairman sa CRRDMC, Vincie Monterde nga nahinabi sa Banat News mibutyag nga sa maong budget gihan-ay na nila ang gahinan niini.

Matud ni Monterde nga nalakip sa maong budget ang rehabilitation ug construction sa mga evacuation center   ug pangandam kung adunay moabot  nga katalagman.

Kasagaran nga himuong evacuation center mao ang mga tunghaan, barangay hall, simbahan ug sports complex.

Apan matud ni Monterde nga lakip sa giaprobahang budget ang pagpangita nila og relocation site alang sa permanenteng evacuation center.

Ang nahisgutang lugar mao ang lapad nga luna  sulod sa compound sa Talisay City Jail sa barangay Maghaway.

Nunot niini, si Monterde nagkanayon nga ang mga residente  sa mga flood prone ug landslide prone area gipahimangnoan kining magmabinantayon kanunay.

Gibutyag ni Monterde nga ang mga opisyal sa kabarangayan giawhag sa pagpahimo sa unang mga lakang nga pagabuhaton  sa mga residente sa pagbiya sa ilang lugar kung  anaa  na sa risgo ang ilang kahimtang.

Matud ni Monterde nga diha sa mga coastal barangay ang kapolisan magpahigayon usab  og mga pahimangno sa mga molupyo  nga mohiklin  ngadto sa mga evacuation center   sa panahon nga adunay moigong katalagman aron malikayan ang disgrasya. (/WC)(BANAT NEWS)