CEBU, Philippines - Patay ang usa ka lalaki nga nagpahugas sa iyang motorsiklo human kini gipusil sa karaang PUJ terminal sa Brgy. Pajo dakbayan sa Lapu-Lapu kagahapon sa buntag.
Ang biktima mao si John Menciano Manabat, 26, residente sa maong barangay. Gitumbok nga mipusil kaniya mao si Redemptor Ermac Rosalenos alyas Bentor, 27, residente sa Brgy. Libho lungsod sa Tabogon. Sa pasiunang imbestigasyon nila ni SPO1 Allan Fredrick Pantaleon ug PO3 Winston Ybañes sa Homicide Section sa Lapu-Lapu City Police Office, naglingkod sa usa ka bangkito ang biktima dihang gihunongan sa usa ka motor nga dunay angkas nga lalaki ug kalit mipusil sa biktima.
Si Manabat nga samaran sa iyang dughan, likod ug abaga dali kining gidala sa Lapu-Lapu City Hospital apan gideklarar nga patay na.
Upat ka basiyo sa balang kalibre 9mm ang nakuha sa crime scene. Gisubay nga anggulo ang kalambigitan sa illegal nga drugas tungod kay nakadawat og report ang kapolisan nga ang biktima ug suspek nalambigit niini. (BANAT NEWS)