Clamping sa CITOM gihingusgan

CEBU, Philippines - Ang kadagkoan sa Cebu City Traffic Operations Management (CITOM) mipahimangno sa mga tag-iya’g sakyanan nga dili magpataka og parking, ilabi na karong panahon sa Sinulog, aron dili i-clamp ang ilang sakyanan.

Sukad sa miaging Lunes daghan na nga mga sakyanan ang gi-clamp sa mga sakop sa CITOM human kini masakpi nga gipataka lang pag-parking daplin sa mga karsada, ilabi na duol sa Basilica del Santo Niño.

Si Joy Tumulak, operations officer sa CITOM, miingon nga kadtong mga tag-iya sa mga sakyanan nga ma-clamp makabayad og multa nga P500.

Apan bisan pa og makabayad na sila sa multa, pabayran usab kanila ang ilang mga pending nga bayranan.

Gipasabot ni Tumulak nga ang tumong sa clamping nga mahunong na ang mga illegal parking sa dalan.

Tambag sa mga sakop sa CITOM nga likayan na lang g’yud ang pagdala’g sakyanan alang niadtong mosimba sa Basilica tungod kay ang hawan sa Plaza Sugbo dili na paparkingan atol sa selebrasyon sa Sinulog.

Daghang mga tawo nga wala na masulod sa Pilgrim Center anaa na lang magpahimutang sa Plaza Sugbo tupad sa Magellan’s Cross diin adunay daku nga LED screen nga gipahimutang ug makita nila ang pari nga nagmisa didto sa altar.    (BANAT NEWS)