CEBU, Philippines - Usa ka bagyo nga gihulagway nga susama kakusog sa bagyong Yolanda ang miigo sa nasod sa Tonga nga nahimutang sa habagatang dagat Pasipiko sa miaging adlaw. Usa ang kompirmadong patay sumala sa kagamhanan sa Tonga ug grabeng kadaot ang naangkon sa tunga-tunga ug sa amihanang bahin sa maong nasud nga pulos mga gagmay’ng isla.
Matud pa nga ang Cyclone Ian nga miigo sa Tonga usa ka category 5 cyclone sama kini sa Typhoon Haiyan (Yolanda) nga miigo sa Pilipinas niadtong Nobiyembre 8,2013 diin dul-an siyete mil ang nakalas ug binilyon ang danyos. Hinuon na-downgrade ang Cyclone Ian sa category 4 dihang miigo kini sa maong lugar ug na-downgrade pa gyud sa category 3 dihang mibiya na kini sa maong nasod.
Ang Philippine Atmospheric, Geophysical and Astronomical Services Administration (PAG-ASA) padayong nag-monitor sa usa ka Low Pressure Area nga kun mokusog kini mamahimo kining bagyo. Kun mamahimong bagyo ang maong Low Pressure nganlan kini sa PAG-ASA og “Agaton.†Nasigpatan kini 200 kilometros ang gilay-on sa habagatang-silangan sa dakbayan sa General Santos Kagahapon sa alas 7:30 sa buntag mipagawas og Rainfall Advisory ang PAG-ASA sa mga lugar sa Surigao del Sur, Surigao del Norte, Agusan del Sur, Agusan del Norte, Davao Oriental, Davao City, Davao del Norte ug Compostela Valley.
Mipahimangno sab ang PAG-ASA sa posibleng baha ug landslides sa maong mga lugar.
Sa nalambigit nga balita, dunay kapin usa ka gatos ka pasahero ug napulo ka cargo trucks ang na-stranded sa Toledo City sukad pa niadtong Biyernes tungod kay wala tugoti sa Philippine Coastguard nga makabiyahe ang mga barko didto padung sa Negros tungod sa kadagko sa mga bawod. (BANAT NEWS)