Ordinansa nga naglimit sa kargamento sa mga trak de karga sa Mandaue gipalabang

CEBU, Philippines - Usa ka ordinansa  ang  gipalabang  sa konseho  sa dakbayan sa Mandaue  aron  pagkontrolar  sa gibug-aton  sa kargamento mga  trak  de karga  nga  sagad  maoy  daling  moguba  sa  mga  karsada  sa maong  dakbayan. Si Konsehal Emmarie Lollipop   Ouano-Dizon nga maoy nagduso sa maong ordinansahon  atol  sa ilang regular session  mipasabot nga kaakohan sa kagamhanan   ang  pag-atiman  sa mga  nasudnon   o  kaha   karsada  nga  iya  sa barangay. Busa  aron malikayan  ang  dali  nga  pagkagusbat  niini, ilang  kontrolahon  ang  karga  sa   mobahasbahas  sa  mga  dagko  nga  sakyanan  sa mga  kadalanan  sa dakbayan.  Gitataw ni Konsehal Ouano-Dizon ang pag-abuso sa paggamit sa mga dalan  sama sa maghinobra   nga  kabug-at sa gikarga niini.           

Hinungdan  nga  miumol  si konsehal  Ouano-Dizon  og  tukmang  ordinansa  aron  dili   makapatuyang  sa pagbahasbahas  sa  mga  karsada  sa siyudad  ang  mga  de karga  nga  maghinobra  ang  kabug-aton  sa kargamento.

Giila ni Konsehal Ouano-Dizon ang  maong  mga  trak  nga  ilang  kontrolahon,  sama  sa  10 wheeler truck  nga mohakot og anapog, bas ug graba sanglit mao kini ang unang   moguba sa karsada. Sa  ordinansa ni Konsehal Ouano-Dizon  gilimitihan  niini nga gibug-aton sa karga sa maong matang sa  sakyanan nga dili mosobra sa 2.30 metros ang gilapdon, dili usab mosobra sa 4.73 metros ang  gitas-on ug dili  molabaw sa 0.92 metros ang gihabogon sa salimbong  niini.  Sa maong ordinansa  gitahasan sa pagpatuman niini ang  City Environment and Natural Resources Office (CENRO) o  Environment officer pinaagi sa paghatag niini og gahom sa pagdakop base sa maong ordinansa nga ipatuman sa dakbayan.            

Dugang pa ni konsehal Ouano-Dizon     nga  angay pahamtangan  og multa  nga   P2,500  ug  pagkabilanggo sulod sa unom ka bulan o pagkanselar sa transport permit nga giluwatan sa dakbayan. (BANAT NEWS)