DOH mi-warning sa posibling pagkatap sa tipdas

CEBU, Philippines - Mipasidaan ang Department of Health (DOH) sa posibleng pagkatap sa mananakod nga tipdas sa nagkalainlaing  dapit  sa nasud.

Sumala pa ni Elvira Bongosa sa Philippine Information Agency sa Central Visayas (PIA-7) nga mao kini  pasidaan  ni Health Assistant Secretary Eric Tayag kagahapon. 

Matud  pa  ni Tayag  nga dali ra  nga  mokatap ang maong sakit kun bugnaw ang panahon.

Gani  miingon  si Tayag nga kaniadto  pang  Nobiyembre  sa miaging tuig, nagpasidaan na ang DOH nga mosaka ang gidaghanon sa kaso  sa tipdas .

Kini tungod kay kining  sakita  manggawas sa panahon sa tingtugnaw ug mohangtud pa gayud sa panahon sa ting-init.

Miingon  si Bongosa nga dali usab kini  makatakod sa mga batang walay bakuna batok sa tipdas.

Matud  ni Bongosa nga gipasabot ni Tayag nga kun ang usa  ka bata adunay tipdas, 90% sa mga kauban niini sa balay o sa usa  ka lugar matakdan usab  sa maong  sakit  kun wala sila mabakunahi. Gibutyag ni Tayag ang mga simtomas sa tipdas ,gitawag sa DOH nga 3 C's:

1.) Conjunctivitis o pagpamula sa mata nga murag adunay sore eyes; 2.) Coryza o medical term alang sa runny nose o sip-on;  3.) Cough o ubo.

Gisaysay usab ni Tayag nga sundan kini og upat ka adlaw nga hilanat ug adunay manggawas nga mga pinong butlog nga katol  ug nga ang maong mga butlog  sa nawong nga murag allergy mokatap sa tibuok lawas nga katol kaayo.

Maoy hinungdan  nga kasagaran kawton gayud sa mga bata.  Midugang  si  Bongosa  nga mihatag usab si Tayag sa mga pahibawo  sa angay buhaton aron makalikay sa tipdas.

 Alang sa mga masuso hangtud sa edad nga 5-ka tuig, kun  hilantan kini angay  nga   patumaron  dayon  og  paracetamol.

Kay  kun  moabot  na  ang  kainiton sa hilanat  og  40  nga  temperature, malagmit magkumbolsyon ang bata nga  kun  dili  madali  sa tambal, malagmit makabsan  sa kinabuhi.   (BANAT NEWS)