CEBU, Philippines - Mga survivor sa bagyong Yolanda nga naa sa Tent City moapil sa Sinulog agi og pasalamat sa Senyor Sto. Nińo nga naluwas sila sa maong katalagman.
Si Letecia Posa, 51, molupyo sa San Jose, San Isidro, Leyte miingon nga moadto gyud siya sa Basilica Menore del Sto. Nińo aron mosimba ug magpasalamat tungod kay naluwas siya.
“Moadto gyud ko sir, manimba baya gyud ko diha pirme, ampo gyud ko sa Ginoo sir pasalamat ko nga naluwas ko, bisan naguba among balay basta naluwas ko,†matud pa ni Posa. Miingon si Posa nga dili lalim ang ilang kasinatian niadtong bagyong Yolanda gani ang iyang uyoan nasamad sa iyang bukton tungod kay dili gyud mogawas sa iyang balay nga gipalid sa hangin.
Dugang ni Posa nga iyang nakita nga ang lubi nga naagian sa bagyo sa dili pa matumba sa yuta napata-pata na kini sa tulo ka higayon.
Usahay dili makatingog si Posa ug manghupaw sa dili pa motubag sa pangutana tungod sa kapait sa iyang nahiagoman.
Apan bisan pa man niining tanan mapasalamaton lang gihapon siya tungod kay naluwas ang iyang pamilya sa maong katalagman.
Sumala pa ni Posa nga maayo ra ang ilang kahimtang sa tent city apan makuyawan lang gihapon siya kun mohuros ang hangin tungod kay mahadlok siya nga mapalid ang ilang tent.
Sa adlaw labi na og init ang panahon dili lang sila mosulod sa tent kay init kaayo mahadlok si Posa nga ma-heat stroke.
“Ok ra man sir, pero kung init dili lang mi mosulod sa tent kay init kuyaw kaayo sa heat stroke,†dugang ni Posa.
Matud ni Posa nga plano niya nga kung aduna sila’y gamay nga pwesto dinhi sa Sugbo ari na lang siya mopuyo.
“May plano kong’ mouli sir pero wala man mi balay naguba man among balay, pero kung naay pwesto diri ari na lang unta mi diri,†dugang ni Posa. (BANAT NEWS)