CEBU, Philippines - Bisan sa kusog nga pagbunok sa uwan, dul-an 50 mil ka mga debotos ang misalmot sa tinuig nga pag-abli sa Fiesta Senyor sa Dakbayan sa Sugbo.
Matud sa hepe sa Waterfront Police Wildemar Tiu, nga miabot sa 45,000 ang mitambong sa labing unang misa sa pagsugod sa siyam ka adlaw nga nobenaryo isip pahinungod kang Sr. Sto. Niño.
Samtang gibana-bana usab ni Tiu nga dunay 30,000 ngadto sa 35,000 ang mikuyog sa prosisyon alang sa Walk With Jesus diin ang mga Sugbuanon, bitbit ang kandila, imahe sa Balaang Bata ug payong mimartsa gikan sa Fuente Osmeña paingon na sa Basilica Minore del Sto. Niño.
Samtang nagprosisyon, misabat ang sumasalmot sa santos nga rosaryo sa Basilica nga gipatukar ug gisibya pinaagi sa mga sakyanan.
Ang Sinulog 2014 nagsubay sa temang “STO. NINO: HOPE OF THE PEOPLE†diin maoy sentro sa wali ni Fr. Jonas Mejares kinsa maoy rector sa Basilica Minore de Sto. Niño ug maoy nangulo sa labing unang nobena misa.
Iyang gibalik-hisgot ang mga miaging katalagman nga miigo sa Pilipinas ilabi na sa Kabisay-an diin daghan ang daw nawad-an og kabtangan ug mga mahal sa kinabuhi human milinog niadtong Oktubre ug mikuso-kuso si super typhoon Yolanda sa misunod nga buwan.
“Dili kita magpabilin sa kasubo pagkahugno sa atong kampanaryo, dili kita magpabiling magul-anon sa pagkatumpag sa atong balay, buildings o mga tulay, kay kining tanan mga pagsuway nga lumalabay. Dili kita angay nga magpadayon sa atong pagbangutan tungod sa pagkahanaw o pagkawala sa atong mga pinangga,†si Fr. Mejares namulong.
Sa wala pa mapupos ang iyang wali, ang rector mihalad og iyang bersyon sa awit nga “You’ll Never Walk Alone.†Gihimo usab atol sa labing unang novena mass ang pormal nga pagtudlo sa Hermana ug Hermano Mayor kinsa mao ang magtiayon nga Jay ug Elvina Roble. Tungod sa kahuot sa mga tawo, pipila ka mga manimbahay ang nakuyapan ug naglain ang gibati. Matud sa Basak Pardo Emergency Response (BPER) kinsa usa sa mga standby emergency medical responder atol sa novena mass, gidala sa Perpetual Succour Hospital ang 76 anyos nga si Exaltacion Gabuya gikan sa Banilad, Mandaue City.
Siya gikatahong nakaangkon og samad sa tuong kilay apan normal ang vital signs human mahatagi og first aid sa mga medics. Laing 10 ka mga tawo ang nakuyapan nga narespondehan usab sa BPER. Lakip sa mga mitambong sa relihiyosong kalihukan mao si Cebu City Mayor Michael Rama kinsa nakaobserbar nga gamay ra ang tawo nga misunod sa prosisyon sa may Fuente Osmeña tungod sa kusog nga uwan nga mibunok sa wala pa kini magsugod.
Ang mayor mihulagway sa Walk With Jesus isip usa ka “wonderful experience.†Ang Basilica abli alang sa tanang deboto sulod sa 24-oras sugod gahapon hangtud na sa Fiesta Senyor. (BANAT NEWS)