CEBU, Philippines - Daw gibati og kasagmuyo ug kaguol ang pipila ka mga residente sa barangay Looc sa dakbayan sa Mandaue tungod sa pag-usab sa dalan sa imahen ni Senyor Santo Niño ug Birhen sa Guadalupe sa pagdala niini paingon ngadto sa Ouano Wharf sa barangay Looc sa maong dakbayan atol sa bisperas sa pista.
Kini tungod kay giusab ang agianan niini gikan sa paggawas sa National Shrine of Saint Joseph sa barangay Centro.
Ang prosisyon adto na mosubay sa dalan S.B. Cabahug Extention ug adto na moliko sa dalan Ouano Avenue, lahos sa eskina dalan Plaridel paingon na sa pagsulod sa bag-o nga Ouano Wharf sa barangay Looc sa eskina sa Juan M. Ceniza sa barangay Looc.
Matud pa sa pipila ka molupyo nga ang mga panimalay nahimutang sa dalan Catalino C. Ouano sa barangay Looc nga maoy naandang rota sa prosisyon, nahimo na nilang tulumanon sa matag tuig nga mopahimutang og mga altar-altar sa gawas sa ilang panimalay.
Susama og pista alang kanila ang maong adlaw tungod kay magbutang gyud sila og mga dayan-dayan ug sadya ang dalan tungod sa mga sound systems nga mopatukar og awit nga Batobalani sa Gugma.
Si Father Philip Pitogo sa National Shrine of Saint Joseph nga nahinabi sa mga tigbalita sa press conference mipasabot nga giusab nila ang rota tungod kay dili na man sa karaang Ouano Wharf manukad ang fluvial parade.
Ang bag-o nga Ouano Wharf nga gipanag-iya gihapon sa maong pamilya nahimutang sa tumoy nga bahin sa dalan Juan Ceniza.
Si Mario Avencula, coordinator sa maong simbahan miingon mas hamugaway ang bag-ong rota nga magdala sa Balaang Pamilya ug dili na maghuot ang mga deboto nga mokuyog niini ngadto sa bag-ong Ouano Wharf.
Matud pa ni Avencula nga sa Biyernes alas -6 sa buntag petsa 17 sa Enero, ang imahen ni Senyor Santo Niño ug Birhen sa Guadalupe dad-on sa Traslacion gikan sa Basilica Minore del Santo Niño padung sa dakbayan sa Mandaue nga pangulohan kini ni Mayor Michael Rama ug mga debotos sa dakbayan sa Sugbo.
Si Mayor Jonas Cortes magpaabot sa utlanan sa Mandaue City diha sa barangay Subangdaku ug maoy modawat ug mangulo sa mga debotos sa ilang siyudad ug mao nay molahos sa pagdala sa imahen ngadto sa National Shrine of Saint Joseph sa barangay Centro. Didto usa ka vigil ang himuon hangtud na sa adlaw nga Sabado alang sa fluvial procession diha sa Mactan Channel balik sa Cebu City. (BANAT NEWS)