CEBU, Philippines - Nalandig sa tambalanan ang 75- anyos nga tigulang babaye nga biktima sa pagpanglabni og ariyos sa dalan Magallanes sa dakbayan sa Sugbo apan ang duha sa tulo ka suspetsado nataymingan sa tourist police ug nangadakpan.
Ang biktima mao si Gemma Villahermosa, taga barangay Guadalupe sa dakbayan sa Sugbo kinsa pwerteng lisanga ug nagpahatud sa tambalanan human sa hitabo.
Nadakpan hinuon sila si Jessie Dayota, 18, taga barangay Bato Carbon sa maong dakbayan ug ang usa ka menor de edad niining kauban. Nasayran nga si PO1 Archie Pahanonot ug PO1 Marlon Villahermosa pulos mga sakop sa tourist police sa Cebu City Police Office (CCPO) adunay gipalit sa maong dapit dihang nahitabo ang pagpanglabni. Daling gidakop ang duha apan nakaipsot ang usa. Nabawi hinuon ang ariyos nga bulawan nga dunay diamante nga nagkantidad og P25 mil. (BANAT NEWS)