CEBU, Philippines - Usa ka bombero ang naangol sa sunog nga miigo sa Saraville Subdivision sa barangay Poblacion sa dakbayan sa Talisay pasado ala 1:00 kagahapon sa hapon.
Ang naangol naila nga si FO3 Omar Andrew Segovia human kini natagakan sa kahoy nga may lansang nga nitaop sa kamot niini.
Si SFO3 Felipe Abarquez, imbestigador sa maong sunog nga nahinabi sa Banat News miingon nga ang sunog nagsugod sa ikaduhang andana sa balay ni Mecia Villarta.
Matud pa nga ang maong kwarto giabangan ni Glen Plaza nga gipuy-an sa anak niini nga si Ringo.
Gikatahong dunay nadunggan nga butobuto sa ikaduhang andana diin gibutang ang bodega sa mga baligyang pabuto. Sumala pa ni Abarquez, nga posible nga short circuit ang hinungdan sa maong sunog.
Nakontrolar ang sunog sulod sa singko minutos ug gibana-bana nga P50 mil ang danyos niini.
Samtang napaso ang usa ka empleyado sa usa ka laundry shop sa dalan Junquera sa dakbayan sa Sugbo kagahapon sa hapon human mibuto ang LPG tank dihang iyaha kining gigamit. Ang naangol naila nga si Jacquiline Guavan, 32, molupyo sa barangay Hipodromo sa dakbayan sa Sugbo. Matud pa sa biktima nga iyang giablihan ang dryer kay magsugod na siya og trabaho apan kalit kining mibuto hinungdan nga napaso ang iyang kalawasan.
Matud ni SFO2 Danilo Relatado nga nahinabi sa Banat News nga leaking sa LPG ang hinungdan sa pagbuto niini.
Sumala pa ni Relatado nga ang appliances sa Mr. Jackoo Laundry House gipadagan sa LPG.
Gibana-bana nga mobalor sa singko ngadto sa siyete mil pesos ang danyos sa maong hitabo human nangabuak ang bildo nga bungbong sa maong laundry shop. (BANAT NEWS)