Guwardiya gipangita
CEBU, Philippines - Gipaabot sa mga sakop sa Investigation Detection and Management Bureau (IDMB) sa Mandaue City Police Office (MCPO) ang pagpatim-aw sa usa sa tulo ka mga guwardiya kalabot sa pagpusil patay sa 26 anyos nga lalaki nga taga Paknaan sa maong dakbayan.
Si Insp. Jimmy Portes nagkanayon nga ang maong mga guwardiya maoy gipabantay sa Jumalia Shipping Inc. sa sitio Latasan, barangay Labogon, dakbayan sa Mandaue .
Sa imbestigasyon nga gihimo nila ni Inspector Portes, ilang nasuta nga adunay samad pinusilan sa iyang aping si Ronnie Alvarado nga taga Zone Sibuyas, Paknaan nga nakaingon sa hinanaling kamatayon niini ug didto na kini mapalgi sa daplin sa dagat. Si Jonard Academia, hingkod ang panuigon nga lumad nga taga Masbate ug guwardiya nga nadestino sa maong establisemento maoy gitumbok nga nagpusil sa biktima.
Ang duha ka mga guwardiya nga kauban ni Academia, nga sila si Jose Fernando Cabahug, 42, ug Moises Sambrano, hingkod, maoy nagtumbok kang Academia nga maoy nagpusil patay sa biktima. Sa PO3 Marino Lufranco sa IDMB sa kapolisan nagkanayon sa imbestigasyon nga ilang gihimo nga alas 2:00 pa pasado ang takna sa miaging Martes sa kaadlawon nahitabo ang maong pagpamusil.
Apan alas 7:00 na pasado ang takna sa buntag nila nga gitaho sa kapolisan sa Presinto 3 nga nagbase sa barangay Basak sa maong dakbayan. Matud pa ni PO3 Lufranco nga ang duha nga guwardiya nga sila si Cabahug ug Sambrano kusganon gayod nga mitumbok kang Academia nga maoy nakapusil patay sa biktima apan dali kining misibat pahilayo human sa maong hitabo. Si PO3 Heraclio Gamboa sa kapolisan sa Presinto 3 nga maoy unang nakatubag sa maong alarma miingon nga dako kaayo ang ilang pagtuo nga gikatahapan ang biktima nga mangawat nga maoy hinungdan sa pagsulod niini sa Jumalia Shipping Compound nga gibantayan sa tulo ka mga guwardiya.
Matud pa ni PO3 Lufranco nga sa kasamtangan ilang gipaabot si Academia nga mopatim-aw sa ilang buhatan alang sa pagtubag sa maong pasangil karon sa iyang mga kauban. (BANAT NEWS)
- Latest
