Walo nag-pot session tiklo

CEBU, Philippines -  Nadakpan sa kapolisan sa akto ang  walo ka tawo nga nag-pot session didto sa sitio Banilad, barangay Tomonoy  sa lungsod sa  Moalboal  sa miaging  buntag.

Si Police Inspector Edgar Labe, hepe sa kapolisan sa maong lungsod  miila sa mga nadakpan nga mao sila si Bernardo Candones, 23, ulitawo: Gleen Marian Templado, 27, Agustin Andagan. 23, ulitawo nga pulos taga   Mahilao, Badian; Abraham Tomarong, 23, ulitawo nga taga Candabong, Alcantara, Elmer Buaya, hingkod, taga Tomonoy, Moalboal, Michael Gimena, 25, ulitawo, Alberto Flores, 25, ulitawo, nga pulos  taga Tuble, Moalboal ug Jiever Concono, 18, ulitawo nga taga Poblacion, Alcantara.

Dugang pa ni Inspector Labe nga  nasakmit  usab  nila ang lima ka pakete nga shabu nga gihingos sa mga dinakpan, duha ka unit nga Samsung cellphone, usa ka Ericson nga cellphone,  salapi nga nagkantidad og P1,490, unom ka disposable lighter ug  pito ka mga tin foil. Si Inspector Labe maoy nangulo sa  pagdakop sa walo ka mga suspetsado  kauban sa  iyang  mga  sakop  nga  sila si PO3 Benidicto Rubia ug PO1 Alrasid Jimian .

Ang kaso nga kalapasan sa Republic 9165 kon Comprehensive Dangerous Drug Act maoy ipasaka batok  sa mga dinakpan nga nagtingkagol na karon sa sulod sa prisohan. (BANAT NEWS)