CEBU, Philippines - Na-rescue sa barangay Punta sa lungsod sa San Remigio kagahapon sa buntag ang usa ka lalaki nga gikatahong natagak gikan sa barko nga padulong sa Sta. Fe sa isla sa Bantayan.
Ang maong lalaki naila nga si Vicente Sevilleno, 34, truck boy, molupyo sa Timiao sa lungsod sa Bantayan.
Matud pa nga naglutaw-lutaw si Sevilleno sa dagat dihang napalgan kini sa grupo sa Bantay Dagat ug sa Provincial Environment and Natural Resources nga bag-ohay lang nakasakmit nianang orasa og mga pinabuthang isda pinangulohan ni Loy Anthony Madrigal.
Sumala pa nga luwan si Sevilleno sa LCT Island 2 vessel nga mibiya gikan sa Hagnaya wharf sa Medellin padulong ngadto sa Sta. Fe wharf sa alas 3:00 sa kadlawon.
Matud pa nga nangihi si Sevilleno sa tuong bahin dihang nakasugat og dakong bawod ang barko nga iyang gisakyan hinungdan sa pagkatagak niini.
Matud pa nga walay nakabantay sa iyang pagkatagak ug swerte lang gyud nga naagian kini sa PENRO diha sa dagat. (/EIM)(BANAT NEWS)