CEBU, Philippines - Napalgan na lang nga patay na ug nagbitay sulod sa selda sa Punta Princesa Police Station ang usa ka lalaki nga may kasong rape sa ala 1:45 kagahapon sa kaadlawon.
Ang namatay naila nga si Tomas Llido, 57, molupyo sa South Hills Drive, barangay Tisa, sa dakbayan sa Sugbo.
Matud pa nga ang on duty nga polis nga si SPO2 Jaime del Mar ang nakakita nga nagbitay nga walay kinabuhi si Llido dihang nagpahigayon ang polis og routine inspection.
Base sa imbestigasyon sa kapolisan nga napalgan na lang kini nga nagluhod ug ang liog niini gihigtan og liston. Wala hinuoy pagduda ang kapolisan sa mga kaubang bilanggo ni Llido kay pwerte man nilang pagkahinanok sa pagkatulog. Ang mga sakop sa Crime Scene Investigation Unit (CSIU) pinangulohan ni SPO2 Teodoro Lumanas ug ang mga sakop sa Homicide Section miingon nga sa inisyal nilang eksaminasyon sa lawas, walay timailhan nga dunay foul play sa kamatayon ni Llido.
Narekober sa kapolisan ang usa ka 85 sentimetros nga liston nga gigamit sa paghigot sa iyang liog. Ipa-ilawom sa autopsy ang patay nga lawas sa namatay aron mahibaw-an kun unsay hinungdan sa kamatayon niini. (/EIM)(BANAT NEWS)