CEBU, Philippines - Namatay ang usa ka lalaki human pusila sa wala hiilhing kriminal nga nagsakay og motorsiklo didto sa barangay Pulpogan sa lungsod sa Consolacion , kagahapon sa alas 3:00 pasado sa kaadlawon.
Ang biktima mao si Carlo Bondillo Jernaldo, hingkod, nga nagpuyo sa maong dapit.
Si PO1 Socrates Borinaga sa kapolisan sa maong lungsod nga nahinabi sa Banat News miingon nga naglingkod ang biktima tapad sa iyang mountain bike dihang miabot ang mga kriminal.
Matud pa ni PO1 Borinaga nga nanaug ang back rider sa motorsiklo ug miduol sa biktima dayong lanit sa pusil niini ug gitirohan sa makadaghan ang biktima. Pagkahagba sa yuta sa biktima, gitiwasan pa kini sa pagpusil, dayong balik og angkas sa nagpaabot nga motorsiklo kaniya ug mipabulhot pahilayo sa maong dapit.
Si PO1 Borinaga miingon nga ang biktima naigo sa tulo ka bala sa iyang kilid , ug sa wala ug tuong bahin sa dunggan. Gihatud dayon kini ngadto sa Eversely Child Sanitarium General Hospital sa barangay Jagobiao ang biktma apan gideklarar kini sa mga doktor sa maong tambalanan nga dead on arrival.
Dugang pa ni PO1 Borinaga nga didto sa crime scene napunitan nila ang tulo ka mga kabhang sa armas nga kalibre 45 nga ilang gituohan nga maoy gigamit sa pagpusil patay sa biktima.
Padayon pang gipangita sa kapolisan ang mga kriminal. (BANAT NEWS)