Kita sa CSBT sa 2013 migamay, apan nakaabot gihapon sa target

CEBU, Philippines - Sama sa gipaabot, nikunhod gyud ang tinuig nga kita sa Cebu South Bus Terminal sa milabay’ng tuig kun itandi sa tuig 2012 sukad nga giwagtang ang tag P5 nga entrance fees sa mga pasahero ug ang gipaubsang parking fee sa mga bus de pasaheroan nga mosulod niini.

Ang tagdumala sa CSBT nga si Vicente Dejoras nagkanayon nga niadtong tuig 2012 atol sa pamunoan pa ni kanhi governor ug karon 3rd district Cong. Gwendolyn  Garcia nikita ang maong terminal og kapin sa 69 milyones pesos.

Apan niining tuig 2013, niabot lamang og dul-an sa 60 milyones pesos ang gikita nila, apan bisan pa man niini nakab-ot hinuon nila ang target nga P55 milyones nga makolekta gikan sa terminal operations.

Daan nang gipaabot nga mogamay gyud ang kitaon tungod sa mga gipatumang kausaban sa mga balayrunon.

Kaniadto, ang mga bus pasaheroan pabayron og tag P200 kada bus nga mosud aron mokuha og pasahero, apan gihimo kining tag P100 na lang.

Ang CSBT maoy usa sa mga tinubdan sa Kapitolyo og pundo aron magamit sa nagkadaiyang proyekto sa lalawigan. - /EIM (BANAT NEWS)