P1.6M nga shabu nasakmit sa Rsog-7 gikan sa drug courier
CEBU, Philippines - Usa ka gipasanginlang drug courier ang nasikop sa operatiba sa Regional Intelligence Division (RID) niadtong Martes.
Si Dexter Caballero nasikop sa Regional Special Operation Group (RSOG), sa M.J. Cuenco Avenue Barangay Hipodromo human sa malampusong transaksyon sa RID.
Nakuha gikan kaniya ang P1.6 milyones nga balor sa drugas nga gidala na sa Philippine National Police Crime Laboratory-7 sa Camp Sotero Cabahug, Cebu City alang sa chemical analysis.
Si RID deputy chief, Supt. Rex Derilo mibutyag nga ang ilang transaksyon adto lang untang Pasko nila himuon apan tungod sa mga kakulian ilaha kining gisibog sa katapusang adlaw sa tuig.
Base sa report nga nadawat sa maong buhatan, si Derilo miangkon nga ang maong mga drugas gikan pa sa Ormoc City sa Leyte nga tuyo nga gipadala sa dakbayan alang sa kasaulugan sa Sinulog. Gikumpirma usab kini ni Supt. Paul Labra II, hepe sa RID, base sa ilang intelligence monitoring.
Apan sa iyang bahin, si Caballero, trisikad drayber, miangkon nga gisugo lang siya sa paghatud sa maong butang sa usa ka buyer nga mao diay ang operatiba hinungdan sa iyang pagkasikop. -/EIM (BANAT NEWS)
- Latest
