CEBU, Philippines - Pipila ka minuto sa wala pa ang kasaulugan sa pagsugat sa Bag-ong Tuig, tulo ka tawo ang gipamusil patay sa ilahang security guard nga miunay og tulis sa bangko diin kini madestino sa Barangay Pajo, Daanbantayan niadtong Martes.
Ang suspek nga si Berly Tudtod, taga-Barangay Dakit, Bogo City, migamit sa iyang service firearm nga 12 -gauge shotgun sa pagpusil sa kauban niini nga security guard nga si Dean Deserto ug sa live-in partner niini nga si Cecilia Torre, pulos taga Barangay Dakit, Barili.
Gipusil usab ni Tudtod si Jenelyn Megabon, accounting clerk sa Fair Bank nga taga Medellin.
Si Tudtod ug Deserto pulos empleyado sa Ricarte Security Agency nga nahimutang sa Barangay East Poblacion, Naga City. Ang duha kauban isip nightshift security guards sa maong bangko.
Ang mga biktima nakaangkon og mga pinusilan sa ulo ug wala na madala pa sa tambalanan kay anang buntag na kini madiskubrihe sa incoming security guard nga si Bernardo Veraque.
Gidala ang mga biktima sa Our Lady of the Rule Funeral Homes alang sa autopsy.
Si PO3 Alfredo Mandal, case investigator, mibutyag nga si Tudtod matud pa manghulam unta og P1,000 kang Deserto apan mibalibad kini kay aduna nay pending termination order si Tudtod epektibo adtong Disyembre 31.
“Nanghagit pa gani kuno og sukmagay kay wala pahulma unya wala pa sa’y info kung asa siya ibalhin,†matud ni Mandal.
Ang order giisyu human mireklamo ang kadagkuan sa bangko sa kadako sa bayranan sa bill sa telepono nga matud pa sa sige og telebabad ni Tudtod.
“Na-trace man sa taga-banko nga siya (Tudtod) ang sige og tawag sa telepono nganong taas og bayrunon aside ana dali ra sad siya masuko sa kauban,†matud ni Mandal.
Mga alas 2:00 sa hapon sa dihang misugot si Deserto nga mouli lang una si Tudtod aron sa pagpreparar sa iyang mga gamit apan anang pagka-alas 11:00 sa gabii mibalik kini kay dunay nahibilin apan kalit lang mikuha ang suspek sa shotgun dayong pusil kang Deserto ug gisunod si Torre nga natulog sa lingkoranan ug dayon si Megabon kinsa anaa sa sulod sa opisina.
Giguba usab sa suspek ang steel cabinet sa bangko pinaagi sa paglangkat sa padlock niini dayong dala sa sulod nga P80,000.
Nakuha sa crime scene ang duha ka mga empty shells sa shotgun, usa ka .38 revolver (service firearm) ni Deserto, duha ka cellular phones, sling bag, ug pitaka.
Si Provincial Investigation Detective and Management Branch officer-in-charge, Chief Insp. Hermano Mallari mibutyag nga si Torre anaa sa maong buhatan kay aron ikauban si Deserto sa pagsaulog sa Bag-ong Tuig kay on-duty man siya nianang mga orasa, samtang si Megabon nag-overtime aron sa paghuman sa mga post debit loan payments.
“Basta end sa month unya end pa gyud sa year duna na sila’y apason,†matud pang Mallari.
Usa ka residente nga nagpuyo sa luyong bahin sa bangko mitug-an sa kapulisan nga alas 11:45 sa gabii dihang nakadungog siya og siyagit sa babaye nga nagkanayon nga “Ayaw Ber! Ayaw Ber!†nga gisundan dayon sa tulo ka sipang buto.
Si Deputy Provincial Director for Administration, Supt. Glenn Candelario Ares, miingon nga dako ang posibilidad nga planado ni Tudtod ang maong krimen base sa paglihok niini.
“We are checking if he had cohorts at that time but right now we are intensifying hot pursuit operation against the suspect,†sigon ni Ares. -/EIM (BANAT NEWS)