CEBU, Philippines - Grabeng naangol ang duha ka managhigala nga gipamusil sa wala mailhing mga lalaki nga nagsakay og motorsiklo sa dalan Maximo Patalinghug Avenue sa sitio Humay-Humay sa barangay Gun-ob, dakbayan sa Lapu-Lapu alas-11 pasado ang takna sa miaging gabii.
Ang mga biktima mao ang 17-anyos nga taga Negros Occidental ug Darwin Pura, 21, taga barangay Umapad sa dakbayan sa Mandaue.
Si PO2 Winston Ybañez sa Homicide Section sa kapolisan sa maong dakbayan nga nahinabi sa Banat News miingon nga padung sa barangay Pajo ang duha dihang kalit silang gisundan sa duha ka wala hiilhing lalaki.
Pag-abot nila sa sitio Humay-Humay kalit silang gipamusil sa maong mga lalaki ug daling mibiya sa dapit. Ang mga biktima pulos naigo sa ilang bukobuko ug gihatod ngadto sa Vicente Sotto Memorial Medical Center sa dakbayan sa Sugbo, wala pa matino sa kapolisan ang motibo sa maong pagpamusil. -/EIM (BANAT NEWS)