31-anyos nga nang-hostage pasakaan og kaso

CEBU, Philippines - Kasong arson ug serious illegal detention ang atubangon sa usa ka 31-anyos nga ginang nga gibiyaan sa bana human niya gi-hostage ang usa pa ka tuig nga pag-umangkon ug gisunog ang balay sa igsuon diha sa bukirong bahin sa Consolacion nga barangay Lanipga niadtong bisperas sa Bag-ong Tuig.

Ang suspetsado mao si Edelyn Reuyan Maliyawaw,   kinsa mitahan sa iyang kaugalingon human sa negosasyon nga gihimo ni barangay kapitan Ressel Balaba.

Si PO3 Socrates Borinaga sa kapolisan sa maong lungsod nga nahinabi sa Banat News miingon nga ilang nadawat ang alarma pinaagi kang Lanipga barangay Kapitan Ressel Balaba kalabot sa pagsunog sa panimalay ug gi-hostage sa suspek ang  pag-umangkon niini.

Si PO1  Richard Pugoy, nga usa sa miresponde didto nga gikahinabi sa DyRC Radyo Calungsod mibutyag nga naugdaw na ang balay sa ilang pag-abot ug nakig-negotiate pa ang kapitan.

Matud ni Pugoy gihiktan sa suspek ang batang hostage diha sa iyang lawas samtang nagkupot kini og sundang nga 22 pulgadas. Human makombinsir, mitahan ang babaye ug sa pagrekisa nakuhaan kini og dugang walo ka pulgadas nga kutsilyo. - /EIM (BANAT NEWS)