CSC modawat na’g nominasyon

CEBU, Philippines -   Ang Civil Service Commission sa Central Visayas (CSC-7) manawat na karon og mga nominasyon alang sa 2014 Search for Outstanding Public Officials and Employees.

Matud pa ni Salve Illustrisimo, usa sa mga tigpamaba sa CSC-7 nga ang mga awards nga ihatag mao ang labing taas ug labing giila nga rekognasyon nga itunol sa ahensya sa gobyerno ngadto sa mga indibidwal o grupo sa mga tawo kinsa magpakita og maayong dedikasyon ug kalampusan sa serbisyo niini ngadto sa publiko.

Dugang pa ni Illustrisimo nga ang tanang opisyales sa career ug non-career service sa gobyerno naglangkob sa gitudlo nga mga opisyales sa barangay ug mga empleyado kinsa mahimong ibuto.

Nagkanayon si Illustrisimo nga ang mga empleyado kinsa anaa ubos sa job order o contract of service walay labot sa coverage sa maong programa.

Ang 2014 Search for Outstanding Public Officials and Employees adunay dakong parte sa Honor Awards Program (HAP) sa CSC ug nga adunay tulo ka kategorya sa pag-award.

Gisaysay ni Salve nga ang Presidential Lingkod Bayan Award itanyag  ngadto sa indibidwal o grupo kinsa mihimo og exceptional o extraordinary nga kontribusyon nga nakahatag og dakong impact sa tibook nasud.

Ang Outstanding Public Officials and Employees o Dangal ng Bayan Award itanyag ngadto sa indibidwal kinsa adunay extraordinary nga performance o akto sa public service ug maayong pamatasan nga base sa Code of Conduct and Ethical Standards for Public and Employees o Republic Act No. 6713.

Samtang ang CSC Pagasa Award ihatag ngadto sa indibidwal o grupo kinsa adunay outstanding nga kontribusyon nga direktang nakabenepisyo sa labaw sa usa ka departamento sa gobyerno.

Gibutyag ni Illustrisimo nga aron mapausbaw ang kalig-on sa teamwork, ang CSC midasig sa grupo o team nga matang sa nominasyon.

Ang nomination forms ug search guidelines mahimong ma-download sa HAP website nga www.csc.gov.ph .

Ang deadline sa maong nominasyon gitakda sa umaabot nga Marso 31, 2014. (BANAT NEWS)