Chatto misubo sa mga lawak saringan

CEBU, Philippines -  Gisubhan ni Gobernador Edgar Chatto sa probinsya sa Bohol ang duha ka lawak saringan sa Tuan Elementary School sa Montesuerte, Carmen ug usab Katipunan High School sa Katipunan, Alicia Bohol, sumala  sa Philippine Information Agency (PIA).

Kini  human  maguba  ang  maong  mga edipisyo  sa  7.2 magnitude  nga  linog  niadtong  Oktubre 15, 2013.

“Grade school and high school students can now hold classes in comfortable classrooms,” kini matud pa ni Chatto

Matud  sa PIA  nga gipasabot  ni Chatto nga ang maong duha ka lawak saringan natukod ubos sa Bayanihan o Long Term Partnership for Education Program sa Provincial government sa Bohol, Department of Education (DepEd) ug usab Armed Forces of the Philippines (AFP).

Sumala pa sa gobernador nga kini usa ka talagsaong panag-alayon sa probinsya sa Bohol tungod kay ang maong lawak saringan natukod pinaagi sa pundo gikan sa Provincial Government ug dayon gitukod kini sa 53rd Engineering Brigade sa AFP.

Nagkanayon si Chatto nga ang maong lawak saringan kompleto sa blackboards, bulletin boards, lingkuranan, lamesa sa magtutudlo, electrical wiring, grills ug usab kasilyas.

Midugang  ang  PIA  nga gisaysay ni Chatto nga pinaagi usab sa mga pribadong donors, ang maong tunghaan nakadawat usab og dugang  mehoras sama sa reference books, ekipo alang sa sports ug uban pang materyales alang sa mga estudyante.

Gibutyag ni Chatto nga sa maong seremonya si Mayor Marnilou Uyaban mitambong gayud atol sa laing turn-over ceremonies, ang AFP nga pinangunahan ni Lt. Col. Julius Tomines sa 2nd Special Forces ug lokal nga mga opisyales nga gipangunahan ni Mayor Jun sa Carmen ug Alicia sa probinsya sa Bohol.  (BANAT NEWS)