CEBU, Philippines - Si Mayor Val Chiong sa dakbayan sa Naga mipahibawo nga ang iyang anak nga si Atty. Kristine Chiong maoy iyang padaganon sa pagka-mayor sa siyudad sa umaabot nga eleksiyon sa 2016.
Matud pa ni Chiong nga ang iyang maguwang nga si Othelo Chiong ug uyoan ni Atty. Kristine maoy molansar isip bise mayor sa maong higayon. Giklaro sa mayor sa Naga nga wala siya’y planong modagan sa taas pang posisyon sa umaabot nga eleksiyon kay mopahuway una siya sa politika.
Apan andam siyang mosuporta sa iyang anak ug maguwang ug uban pang kaalyado nila sa politika. Ang bise mayor karon nga si Delfin Senior molansar usab nga konsehal sa siyudad.
Ang mayor nagkanayon nga sa sunod eleksiyon ang iyang prayoridad mao ang pagpahuway una sa politika.
Kahinumdoman nga si Chiong kinsa kaalyado sa Alayon Party maoy mipuling mayor sa Naga dihang ang iyang igsuong si kanhi mayor Ferdinand Chiong mitaliwan tungod sa sakit nga cancer niadtong tuig 2006.
Niadtong eleksiyon sa 2007 si Chiong maoy napiling mayor sa siyudad hangtud sa misunod nga eleksiyon sa 2010 ug 2013. (BANAT NEWS)