Mga pabrika ug tindahan sa pabuto gi-inspection

CEBU, Philippines - Gisubli sa kapolisan ang  pag-inspection sa mga tindahan og mga pabrika  sa rebentador sa barangay Babag, dakbayan sa Lapu-Lapu isip kabahin sa ilang pagpangandam sa pagsugat  sa Bag-ong  Tuig 2014.

Nunot kini sa pagtuo sa kapolisan nga kun dili man kaayo daghan ang nagpabuto sa Pasko apan posible usab nga daghan ang magpabuto sa pagsugat  sa Bag-ong Tuig.

Kini   maoy hinungdan nga padayon ang ilang higpit nga pagbantay  sa pabuto, matud  pa ni Senior Superintendent Rey Lyndon Lawas, director sa kapolisan sa Lapu-Lapu City Police Office (LLCPO).

Si Sr. Supt. Lawas  maoy nangulo sa pag-inspection sa mga permit   sa  mga  nagpabrika  og  pabuto  sa Lapu-Lapu.

Gawas  sa  mga  pabrika  gisusi  usab  ang  mga   tindahan  sa paboto sa barangay Babag.

Gawas  sa pag-inspection  ila  usab  nga gipahimangnoan  ang  mga  tag-iya  sa pabrika  ug  tindahan  nga  manglimpyo   sa ilang palibot sa mga biya nga pulbora o pabilo nga kuyaw kaayo nga madagkotan   ug  maoy makaingon sa pagsilaob niini.

Dugang nilang gisusi ang mga nagtrabaho sa pagsuta kun may mga menor  de edad ba nga nanarbaho  og paboto.

Hinuon  wala  sila’y  namatikdan   nga  mga  batan-on sulod  sa mga  pabrika  nga  ilang gi-inspection   o  kaha  nagbantay sa mga tindahan sa pabuto sa maong dakbayan.

Ang laing pahimangno sa kapolisan mao ang paglikay sa pagkarga og mga rebentador  sa mga sakyanan o barko nga walay permit gikan sa legitimate nga mga namaligyaay niini o mga tiggama.

Kay  kun  walay permiso  hayan  nga  sikopon  sila  sa  mga  otoridad  sanglit ilhon man kini nga illegal. (/WC)(BANAT NEWS)