CEBU, Philippines - Gipasakaan og kasong kalapasan sa Republic Act 9165 kon Comprehensive Dangerous Drug Act of 2001 ang tawo nga nadakpan samtang naghantak, apan nasakmitan usab og shabu sa dalan Olivar sa barangay Poblacion, dakbayan sa Danao sa miaging hapon.
Ang nagtingkagol na sa prisohan mao si Joseph Risbon Castro, 26 , minyo, ug walay trabaho nga taga sitio Cambiohan sa barangay Poblacion sa maong dakbayan.
Didto siya hidakpi sa hantakan nga kauban sa mga tawo nga nagtapok sa maong dapit kay naghantak.
Si PO3 Arnold Labine miingon nga milampos ang ilang pagronda sa naghantak human madawat nila ang taho gikan sa mga nagpakabana nga molupyo sa maong dapit.
Dugang pa ni PO3 Labine nga nakamatikod sa ilang pag-abot ang mga tawo nga naghantak maoy hinungdan nga mialibwag kini og panagan pahilayo sa maong dapit.
Ang suspetsado nga nakalitan ug wala makalihok maoy ilang nagunitan hinungdan nga ilang nadakpan. Apan dihang ilang girikisa ang bulsa sa gisul-ob nga purol niini didto ra ang usa ka paketeng shabu sa sulod.
Gumikan sa maong ebidensiya ila dayon kining gisignit ug gibalhog sa bilanggoan.
Ila dayong gipasakaan og kaso nga kalapasan sa paghupot sa illegal nga drugas. (BANAT NEWS)