CEBU, Philippines - Ang kapolisan sa dakbayan sa Talisay nangita pa og mga saksi batok sa kriminal nga mipusil patay sa inahan ug anak sa sitio Riverside, barangay Lawaan II, dakbayan sa Talisay sa miaging bisperas sa Pasko.
Nagpabilin pang blangko ang kapolisan sa mipatay kang Carlota Caña ug sa anak niining si Christian Caña dihang gisulod sila sa kriminal sa ilang balay dayon gipamusil.
Si Carlota namatay human makaangkon og samad pinusilan sa walang bukton kay ang bala milapos sa walang bahin sa iyang lawas. Didto siya ideklarar nga patay na sa pag-abot didto sa Talisay City District Hospital. Si Christian kinsa nakaangkon og duha ka samad pinusilan sa tiyan, duha ka samad pinusilan sa walang bukton ug usa sa ulo gihatud ngadto ngadto sa Vicente Sotto Memorial Medical Center.
Apan matud ni SPO1 Mikie Espina nga nahinabi sa Banat News miingon nga namatay ang nahisgutang biktima mga alas 5:00 pasado sa buntag niadtong adlaw gyud sa Pasko . Matud ni Espina nga personal nga bangi ang ilang gitutokan karong hinungdan sa hitabo.
Gibutyag ni Espina nga ang suspetsado paryente sa mga biktima ug giingong nakabangi kini ni Carlota kaniadto ug sa maong bangi gigukod ang naulahi og sundang sa suspetsado.
Matud ni Espina nga nangayo og panabang sa mga polis si Carlota hinungdan nga nadakop kaniadto ang suspetsado ug nadetener sa Talisay City detention cell .
Apan dihang nakagawas kini, ang suspetsado ug si Christian nagkasinumbagay ug nagbinaharay.
Matud usab ni Espina nga nangita pa sila og witness sa hitabo ug nanguha pa usab sila og dugang ebidensiya batok sa suspetsado aron pormal kining mapasakaan og kaso. (BANAT NEWS)