CEBU, Philippines - Patay ang usa ka inahan samtang kritikal ang anak niini human sak-a sa ilang balay ug gipamusil sa wala hiilhing tawo didto sa sitio Riverside, barangay Lawaan II, dakbayan sa Talisay, atol sa Pasko.
Ang biktima mao si Carlota Caña, 38, ug anak niining si Christian Caña, 20, usa ka car washer, pulos nagpuyo sa maong lugar.
Si Christian nakaangkon og duha ka samad pinusilan sa tiyan, duha sa walang bukton ug usa sa ulo. Samtang si Carlota nakaangkon og samad pinusilan sa walang bukton ug ang bala milapos sa walang bahin sa lawas niini.
Si Carlota patay na sa pag-abot didto sa Talisay City District Hospital samtang si Christian gibalhin kini ngadto sa Vicente Sotto Memorial Medical Center (VSMMC) sa kritikal nga kahimtang.
Sila si PO2 Jason Del Campo, PO2 Edwin Campomanes ug PO1 Marlon Añabeza maoy daling miresponde sa maong hitabo.
Sa imbestigasyon sa kapolisan nasuta nga sa mga ala 1:00 pasado sa kaadlawon niadtong Disyembre 25, 2013 samtang natulog ang inahan ug anak usa ka wala hiilhing lalaki ang misulod sa ilang balay ug unang gipusil si Christian.
Si Carlota nakadagan ug nakasinggit pa og panabang sa ilang mga silingan apan gipusil usab kini sa maong lalaki.
Si Superintendent Resty Santos, officer-in-charge sa Talisay City Police Station sa pakighinabi sa Banat News kagahapon nagkanayon nga blangko pa sila sa motibo sa maong hitabo.
Apan gibutyag ni Santos nga adunay mga nakaaway kaniadto si Christian ug gani ilang giimbistigar ang nakaaway niini. Matud ni Santos nga sa ilang imbestigasyon wala silay nakita o nabantayan nga ang maong mga nakaaway kaniadto sa biktima may labot sa hitabo karon.
Ang hepe sa kapolisan nagkanayon nga posibleng adunay nasuko kang Christian ug siya lang unta ang tuyo nga pusilon, apan tungod kay nakakita man ang inahan niini giapil na lang usab sa pagpusil.
Dugang ni Santos nga paladman nila ang imbestigasyon sa pagsuta sa motibo sa maong insidente ug sa pag-ila usab sa kriminal. (BANAT NEWS)