Bombero mipakusog sa kampanya

CEBU, Philippines - Labing gipakusgan  sa  mga  tinugyanan  sa bombero  sa dakbayan  sa Mandaue ang  gilusad  nilang  kampanya  adlaw-adlaw batok  sa sunog  samtang  nagkaduol  na ang  pagsaulog  sa Bag-ong  Tuig.

Matud pa  ni  Fire /Chief Ronaldo Orbeta, Mandaue City Fire Marshal sa Bureau of Fire Protection (BFP) nga  ang  maong kampanya  gisugdan  sa miaging  semana  sa  wala  pay  Pasko  gikan  sa alas 7:00  sa gabii  hangtud  sa alas 9:00 sa  gabii. Usa  sa gibantayan  sa maong  mga bombero  ug  ang  mga  lugar  nga paluparon  nga    pyrotechnic  aron  sa pagsuta  sa  matagak  nga  mga tipaka  niini.

Midugang  si  Orbeta   nga ang  iyang  mga  sakop  anha  magmonitor  sa mga  lugar  nga  daghan  ang  mga  kabalayan aron masuta  kun  wa bay  mopabuto  og  firecracker.

Sayo  niini  higpit  nga gidili  sa balaod  ang  pagpabuto  og  mga  firecracker  sa maong  dakbayan.

Hinuon  sa milabay’ng  Pasko  wala’y  namatikdan  ang  kabomberohan  nga sunog  gumikan sa pabuto.

Ang  labing  gibantayan  pag-ayo  sa maong  mga  otoridad  mao  ang  North Bus Terminal; mga Mall; Pulang Bukid, Paknaan; Sitio Sapa-Sapa sa  Guizo; duol  sa  barangay hall   sa  Opao; atubangan  sa  Iglesia ni Cristo   sa  Bakilid; Cambaro; ug  Fatima-Basak  nga  mga  lugar.

Gawas  sa gisabwag  nga  mga leaflets,  ang  buhatan  sa  bombero mipagawas  usab  sa ilang  duha  ka trak  sa bombero uban  ang lanog  kaayong  sound  system niini.

Walay  music  ang  sound system,  kundi  mga  pahimangno  batok sa sunog  ang  mabati  sa   trumpa  niini.

Miingon  si Orbeta nga nagpasalamat  siya  nga  misanong  ang  katawhan  sa ilang  pahimangno  sa  miaging  Pasko,  ug gipaabot  niya  nga  ingon  usab  niini  ang  angay  nga  mahitabo sa umaabot  nga  pagsugat  sa Bag-ong  Tuig. Midugang  siya  nga  kanunay  niyang  gipaalerto  ang  iyang  mga  tawo  ug  mga  sakyanan.

May  upat  sila  ka trak  sa bombero,  usa  niini  ang  may  areal ladder,   usa  ka  boom truck   ug  ang  ilang   water tanker.

Ang  labing  bag-o  nga trak  sa bombero  mao  kadtong  P23 milyones nga  Rosen Bauer,  usa  ka  brand  new  nga  pinalit  gikan  sa  Austria   nga  adunay  high   ug low pressure pump.

Mokarga  kini  og 50 mil  ka  gallon  matag  minuto  nga may  rescue equipment  usab,  sumala  pa  ni Orbeta. (BANAT NEWS)