Kongreso gihangyo usbon ang Senior Citizen Act

CEBU, Philippines - Giduso ni  Cebu 6th  District Provincial Board Member Thadeo  Ouano ang resolusyon nga nag-awhag sa  mga kongresista ug mga senador sa nasud nga amendahan ang   balaod nga Expanded Senior Citizen Act of 2010.

Sa maong  resolusyon  gihangyo  ni  Ouano  nga  ipalakip  ang  diskuwento   nga  20  porsento  sa paliton  nga   food and mineral supplement  sa  mga  tiguwang.

Matud pa ni Ouano nga ubos sa Section 11 sa Article 13 sa Philippine Constitution gimando niini ang paghatag og dakong pagtagad sa mga kabus, masakiton, katigulangan, adunay kabilinggan sa panglawas, kababayen-an ug kabataan.

Samtang sa Section 4 sa Article 15 sa mao gihapong balaod gipadayag   niini  ang dakong kaakohan sa pamilya sa pag-atiman sa ilang katigulangan sanglit ang estado sa nasud nagdesinyo man og mga programa sa paghatag kanila og tukmang kasiguroan.

Dugang pa ni Board Member Ouano  nga angay lamang nga masubli ang paghimo og mga pagtuon ang kongreso ug senado alang sa pagsuta kun ang Expanded Senior Citizen Act 2010 mihaum ba gayod sa tumong ug katuyoan alang sa pagtabang sa katigulangan dinhi sa nasud.

Gipasabot ni Ouano nga ubos sa Article 7 sa Rule IV sa Implementing Rules and Regulation (IRR) sa Expanded Senior Citizen Act 2010  gihatag nga pabor ngadto sa katigulangan ang 20 porsento nga diskuwento sa pamalitong  tambal ug mga bakuna ug  himoon  usab  nga  gawasnon  sa Valued Added Tax. (Romeo  T. Limpangog/WC)

Gitigbas  sa kainom  angol

Didto  mamasko  sa hospital  ang  usa  ka ulitawo  nga  gitigbas  sa  iyang  kainom  atol sa Christmas  party   didto  sa   Basubas  Street  sa  barangay  Upper Tipolo , sa dakbayan  sa Mandaue  alas 12:00  sa tungang  gabii  niadtong   Martes.

Ang  biktima  nailhan  nga  si Dionesio  Cabajar Guinaldo, 30, ulitawo  nga taga  Tipolo, samtang  ang  suspek  mao  si Romeo Alimorin Naingue, 40, minyo,  nga taga lungsod sa Consolacion.

Si PO1 Jessie James Galo sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku nga nahinabi sa Banat News miingon nga sayo pa sa gabii sa gipahigayong  Christmas party    nag-inom ang  biktima   ug  ang suspetsado.

Dihang  nalasbag  na nangisug  na  ang  suspetsado   busa  gibadlong  kini  sa  mga  kauban.

Apan  inay  mokalma,  misamot  na  hinuon  ang  pagpangisog  niini,  nagpunay  na  og  yawyaw    sa kasuko.

Tungod  kay  hubog  gipasagdan  na lang sa  mga  kauban , apan  nakapunit  kini  og  sundang sa palibot.

Ang  maong  sundang  giingong  nabiyaan  sa usa  ka  tawo    nga namugha  og  kahoy  sa sayo  pa.

Ang  biktima  nga  wala magdahum  nga    may  mahitabo  kaniya  nagtalikod  ug  misangkiig  kini  sa kasakit  dihang  gihapsan  sa  sundang  ang  iyang  buko-buko.

Gumikan  sa  kakusog  sa pagtigbas  milapos sa bukog  sa dugokan  ang  suwab  sa sundang.

Gihatud dayon  ang  biktima  ngadto  sa  Mandaue City Hospital sa mga kabanay ug ang suspetsado nga   mura’g  naghuramentado  gipadakop  dayon  sa kapolisan  ug  gibalhug sa prisohan  samtang  nagpaabot  sa kiha  nga  ipasaka  batok  kaniya.  (BANAT NEWS)