CEBU, Philippines - Bisan og ang dakbayan sa Ormoc nakasinati og katalagman nga mibiktima sa daghan niini nga mga lumulopyo apan mihatag gihapon kini og tabang-salapi ngadto sa dakbayan sa Sugbo.
Si Ormoc City Administrator Francis Pepito personal nga mihatod sa P300,000 nga tseke ngadto sa opisina ni Mayor Michael Rama isip ilang tabang sa dakbayan sa Sugbo nga nabiktima usab sa linog kaniadtong Oktubre 15.
Matud ni Pepito nga ang hukom sa mga opisyal sa Ormoc nga mohatag og tabang-salapi sa dakbayan sa Sugbo nakab-ot dihang wala pa mabiktima sa bagyo ang ilang dapit.
Ang dakbayan sa Ormoc apil sa mga dapit sa Kabisay-an nga gikuso-kuso pag-ayo sa bagyo ug gani gitabangan kini sa kagamhanan sa dakbayan. Si Mayor Michael Rama miadto gani g’yud sa Ormoc sa paghimo’g relief operations.
Si Mayor Rama dili gyud unta modawat sa tabang gikan sa Ormoc kay nagkinahanglan usab kini og tabang apan sa ngadto-ngadto nahukman niya nga dawaton na lang ang tabang ug mapasalamaton sa pagka manggihuna-hunaon sa mga opisyal sa Ormoc.
Matud ni Rama nga ang salapi nga gitabang sa Ormoc idugang kini sa natigum na sa dakbayan alang sa pagpatukod og bag-ong ospital.
Hangtud kaniadtong Disyembre 16, miabot na og P8.5 milyones ang kantidad nga natigum sa dakbayan gikan sa mga donasyon.
Samtang si Mayor Rama mitataw nga walay problema alang kaniya kun asa tukora ang bag-o unya nga ospital. Ang Cebu City Medical Center (CCMC) building wala na ipagamit ni Mayor Michael Rama kay nakasinati kini og dagko nga liki tungod sa linog. (BANAT NEWS)