CEBU, Philippines - Gipamutangan na kagahapon og masking tapes ug gipirmahan sa mga opisyal ang mga armas sa kapolisan aron i-discourage sila pagpataka og pabuto niini atol sa Pasko ug Bag-ong Tuig.
Si Chief Supt. Danilo Constantino, hepe sa Police Regional Office 7 miklaro hinuon nga wala kini magpasabot nga di na mahimong gamiton sa mga polis ang ilang armas panahon sa pagresponde.
Matud pa ni Constantino, katungdanan sa mga polis ang pagtabang sa nanginahanglan ug kung kinahanglang gamiton ang ilang armas mahimo nila kining gamiton.
Mipasidaan hinuon si Constantino ngadto sa mga sakop nga di magpabuto sa way igong hinungdan kung dili sila gustong mag-atubang og kaso. Walay gitugotan si Constantino nga makabakasyon nga mga polis karong kapaskohan aron dunay paigong pwersa tungod sa hulga sa mga tulisan ug mga badlungon. (BANAT NEWS)