CEBU, Philippines - Mikabat sa 25 ka kilo sa karneng baboy nga giingong hot meat gisakmit sa Meat Task Force didto sa merkado publiko sa barangay Tabunok, dakbayan sa Talisay kagahapon sa kaadlawon.
Ang task force gipangulohan ni Talisay City Veterinarian Dr. Santiago nga maoy misikop niini gikan sa mga lamesa sa karne sa merkado. Si Hortel nga nahinabi sa Banat News kagahapon nagkanayon nga wala sila’y kompiyansa karong panahona nga gituohan nilang daghang ipalusot nga karneng wa ihawa sa ihawan sa siyudad.
Matud ni Hortel nga lakip nila nga gisusi mao ang mga baligyang karne sa mga supermarket ug fast food chain.
Gipasabot sa city veterinarian nga buot nilang masiguro nga limpiyo ug walay sakit ang mga karneng ipamaligya sa kamerkadohan aron malikayan ang kadaot sa panglawas sa mga konsumedor. Ang mga karneng giihaw gawas sa ihawan wala ma-inspection sa mga meat inspector busa peligro kini nga may sakit. Gibutyag ni Hortel nga sa buwan sa Disyembre mikabat sa 1,250 ka mga baboy ang maihaw matag semana sa ihawan sa dakbayan. Sa milabay’ng mga buwan o sa regular season mokabat lang sa 1,050 matag semana ang maihaw nga baboy. Matag ulo sa maihaw nga baboy may bayranang P220 ang mopaihaw niini.
Ang P220 maoy bayad sa post mortem, anti-mortem, slaughter, holding, ug uban pang bayranan nga arkabala. (BANAT NEWS)