Multicab vs trak usa patay
CEBU, Philippines - Usa ang patay samtang kritikal ang lalaki ug babaye human nakabangga ang usa ka Isuzu elf truck ug usa ka multicab sa South Road Properties kagahapon sa kaadlawon.
Ang namatay naila nga si Menche Fuentes, 22, molupyo sa barangay Datak sa lungsod sa Cordova, drayber sa multicab, samtang naangol nga kauban niini mao si Maria Cloernalyn Ybañez, 22, taga barangay Cansojong sa dakbayan sa Talisay.
Samtang kritikal pa ang kahimtang sa usa ka lalaki nga wala pa mailhi nga nakuha sa ilawom sa Isuzu elf. Matud pa nga ang trak padulong sa habagatang dapit samtang ang multicab padulong kini sa amihanan dihang nahitabo ang aksidente.
Si SPO1 Anthony Delegiro, imbestigador sa maong hitabo miingon nga mikawat og lugar ang maong trak ug gani mibag-id na kini sa center island sa dalan.
“Ang elf ni-encroah sa pikas lane maong na head-on ni sila,†dugang ni Delegiro. Daling gidala sa Cebu City Medical Center si Fuentes apan gideklarar kini nga dead on arrival. Samtang gidala sab sa Chong Hua Hospital si Ybañez.
Ang mga sakop sa Emergency Rescue Unit Foundation nakakuha sa usa ka wala pa mailhing lalaki nga didto naugkat sa ilawom sa elf nga gihulagway nilang 50-50 ang kahimtang.
Matud ni Delegiro nga ang trak gipanag-iya sa MC Engineering Inc. nga nagbasi sa kaulohan. Gisubay pa sa kapolisan kun kinsa ang maong lalaki nga nakuha ilawom sa trak kun siya ba ang drayber sa maong trak sanglit wa may identification card ang maong lalaki. (BANAT NEWS)
- Latest
