CEBU, Philippines - Kritikal karon ang kahimtang sa usa ka 19-anyos nga lalaki human kini dunggaba sa ilang silingan niadtong Miyerkules sa alas 2:00 sa hapon diha sa sitio Sambagan, barangay San Isidro, dakbayan sa Talisay.
Ang biktimang si Jonald Rosco, residente sa maong dapit kinsa nakaangkon og samad dinunggaban sa dughan dali kining gidala ngadto sa Talisay City District Hospital apan tungod sa kahimtang niini gibalhin ngadto sa Vicente Sotto Memorial Medical Center.
Ang suspetsado mao si Larry Lisondra, 47, residente sa nahisgutang lugar ang nasikop atol sa gipahigayong hot pursuit operation sa mga polis ug nakuhaan og kutsilyo.
Nasuta sa imbestigasyon nga ang biktima natulog ilawom sa punoan sa kahoy nga Talisay dihang gidunggab kini sa suspek nga dugay nang may kasuko sa biktima.
Sa laing bahin, kritikal usab ang laing lalaki human kini pusila niadtong Miyerkules sa alas 2:50 sa hapon diha sa sitio Kimba, barangay Cansojong, dakbayan a Talisay.
Si Ronilo Quilaton, 48, residente usab sa maong lugar nakaangkon og samad pinusilan sa walang bahin sa ulo daling gidala ngadto sa Talisay City District Hospital apan gibalhin usab kini ngadto sa VSMMC.
Gipangita karon ang suspetsadong si Jose Gabutan, 41, silingan sa biktima. Matud pa nga diha sa usa ka vulcanizing shop ang biktima dihang kalit kining gipusil sa suspek, nasuta nga duna nay personal nga panagbangi ang motibo sa maong pagpamusil. (BANAT NEWS)