Tagdumala sa CSBT mohangyo nga iuktaba ang suspension sa Ceres
CEBU, Philippines - Mohangyo ang tagdumala sa Cebu South Bus Terminal ngadto sa Land Transportation Franchising and Regulatory Board (LTFRB) 7 nga i-uswag ang suspension order batok sa prangkisa sa Vallacar Transit Inc. kansang usa ka bus nalimbuwad didto sa lungsod sa Badian.
Matud ni Vicente Dejoras, tagdumala sa CSBT nga gusto niyang ipauswag ang suspension human sa Sinulog.
“Kung pwede ang suspension unya na lang after na sa Sinulog. Maluoy ta sa atong mga igsuon nga taga-probinsya, manguli tawon sila,†sumala pa ni Dejoras.
Gikatakdang makigkita karong adlawa si Dejoras sa mga opisyal sa LTFRB. Nanghinaot usab siya nga mahatagan og gibug-aton ang iyang hangyo.
Dugang pa ni Dejoras nga dili lamang makaapekto sa kompanya ang pagkasuspenso sa mga bus kundili ngadto usab sa mga pasahero ilabi na nagsingabot na ang Pasko.
Niadtong Martes sa hapon, gipakanaog sa LTFRB ang suspensyon sa napulo ka bus sa Vallacar Transit Inc. ug kini molungtad hangtod sa usa ka buwan.
Duha ang patay samtang 32 ang naangol sa pagkalimbuwad sa usa ka bus nga gipanag-iya sa maong kompanya. Sa lagda sa LTFRB nga kun dunay mamatay sa operasyon sa usa ka bus, ang tanan nga bus ubos sa parehong franchise ipailawom sa road worthiness test.
Gimando usab sa LTFRB ang pagpailawom sa road safety seminar sa tanang mga drivers sa Ceres Bus. (BANAT NEWS)
- Latest
