CEBU, Philippines - Mikabat sa tunga sa milyon ka pesos ang kantidad sa salaping nasakiyo saw ala hiilhing kawatan nga milungkab sa usa ka travel agency nga nahimutang sa Machay Building sa barangay Kamputhaw Gorordo Avenue dakbayan sa Sugbo sa miaging hapon .
Ang liaison officer sa maong buhatan nga nahinabi sa Banat News miingon nga siya maoy nakadawat og tulo ka miss call ug usa ka text gikan sa usa ka empleyado sa maong opisina nagpahibawo bahin sa pagpanglungkab.
Ang liaison officer nga wala mopaila sa iyang ngalan miadto sa maong opisina ug nakita niya nga naghilak ang maong empleyado. Didto nakita sa maong opisyal nga giguba ang hunos sa cashier, vault, ug ingon man ang pultahan sa opisina sa manager. Ila dayong gisumbong ngadto sa buhatan sa Theft and Robbery Section sa Cebu City Police Office ug diha-diha mirespondi dayon ang kapolisan
Nagduda ang maong opisyal nga inside job ang maong pagpanglungkab .
Miingon kini nga 12 na ka tuig siyang nagtrabaho sa maong lugar ug kaila na niya ang tanang empleyado sa maong buhatan.
Midugang ang maong opisyal nga ang CCTV sulod sa ilang opisina nakakuha og hulagway sa tawo nga nagkawo , mubo ug tambukon apan wala makita ang nawong.
Nasakiyo sa wala hiilhing kawatan mao ang P53,830.00, $ 9,686.00 ug cheque nga $1, 759.00 Padayon pa ang imbistigasyon sa kapolisan sa maong panghitabo. (BANAT NEWS)