CEBU, Philippines - Gibuksan sa kagamhanan sa dakbayan sa Mandaue sa miaging gabii ang mga kalingawan nga gipahaum sa pagsaulog sa Pasko karong tuiga pinaagi sa pagpasiga sa 12 feet nga Christmas Tree didto sa Heritage Plaza sa barangay Centro sa maong dakbayan.
Si Mayor Jonas Cortes maoy nangulo sa pagpasiga niini uban ni Bise Mayor Glenn Bercede, mga sakop sa konseho nga naglakip kanila ni Emmarie Lollipop Ouano-Dizon, Editha Cabahug, Jimmy Lumapas, Bethoveen Andaya, Jefferson Ceniza, Diosdado Suico, Demetrio Cortes Jr. Benjamin Basiga ug Nenita Layese.
Samtang ang barangay kapitan sa Subangdaku nga mao usab ang Association of Barangay Council (ABC) Federation President Ernie Manatad maoy nangulo sa 27 ka mga barangay kapitan nga mitambong sa maong kalihokan.
Ang maong kalihukan maoy una nga gilusad sa inter barangay parol contest nga gisugdan pinaagi sa usa ka pasunding sa ilang kaugalingong ginama nga mga parol nga gigamitan og mga linabay na nga materyal sama sa papel, bottled water ug uban pa.
Dugang nga kalihokan mao ang ceremonial lighting sa Christmas tree ug gitapos usab sa fireworks display.
Si Roger Paller nga maoy Public Information Officer (PIO) sa maong dakbayan nga nahinabi sa Banat News miingon nga sa matag gabii sa dili pa ang adlaw sa pagsaulog sa Pasko pasiugdahan ang nagkadaiyang kalingawan nga naglakip sa mga konsiyerto sa banda. (/WC)(BANAT NEWS)