CEBU, Philippines - Nasikop sa kapolisan ang duha ka lalaki nga mi-carnap sa usa ka van sa dalan Kaoshiong, North Reclamation Area sa barangay Mabolo sa dakbayan sa Sugbo pasado alas 11:00 sa miaging gabii.
Base sa spot report sa Cebu City Police Office ang maong mga suspetsado naila nga si Ricky Aurello, 20, molupyo sa Villagonzalo, barangay Tejero sa dakbayan sa Sugbo ug si Richard Tagalog, 37, taga McArthur Boulevard, barangay Tejero sa dakbayan sa Sugbo.
Samtang ang biktima naila nga si Robert Raymond Zamora, 45, taga V. Rama Avenue sa mao gihapong siyudad.
Midangop si Zamora sa panabang sa Mabolo Police Station ug mitaho nga gikarnap ang iyang sakyanan nga KIA Bongo Aluminum Van nga may plate number LNN 380 didto sa dalan Palma sa barangay San Roque sa dakbayan sa Sugbo.
Matud sa biktima nga ang maong kinawat nga sakyanan gidala sa nag-karnap niini padulong sa SM, ug sa pagresponde sa Mabolo Police Station naabtan kini diha may Kaoshiong Street sa may sa North Reclamation Area sa barangay Mabolo.
Narekober sa mga polis ang sakyanan sa biktima nga gidala sa duha ka mga suspetsado. Pasakaan og kasong kalapasan sa R.A. 6539 o Anti Carnapping Law sa kapolisan ug kasamtangan kining gitanggong sa karsel sa Mabolo Police Station. (Bryner Diaz/EIM)
25,000 libro gidonar sa Arkansas diha sa Mandaue
Gitugyan sa Children International nga nagbase sa Arkansas sa nasud sa Amerika ang 25,000 ka imported nga mga libro ngadto sa kagamhanan sa dakbayan sa Mandaue isip donasyon alang sa mga publikong tulunghaan niini.
Si Rebecca Fuellos nga maoy program chief sa maong kahugpongan maoy mitunol sa maong mga libro nga gisulod sa 40- footer van, kini giapod-apod ngadto sa 48 ka mga tulunghaan nga naglakip sa elementary ug high school.
Sa gipahigayon nga turnover ceremony niadtong miaging adlaw, si Angelina Cagutalian, city librarian sa Mandaue, miingon nga dako kaayo kini og ikatampo sa pagpalambo pa sa edukasyon sa kabataan dinhi sa nasud si Roger Paller, tigpamaba sa kagamhanan sa Mandaue City nga nahinabi sa Banat News miingon nga ang 25, 000 ka libro ang gilangkoban kini sa mga bag-o og karaan nga mga libro. (/EIM)(BANAT NEWS)