CEBU, Philippines - Patay ang usa ka batang babaye ug angol ang unom ka tawo lakip na sa usa ka bombero dihang miulbo ang dakong sunog nga miugdaw sa duha ka building sa dalan Bonifacio, Simuon ug D. Jakosalem sa barangay Pari-an sa dakbayan sa Sugbo sa alas 4:30 kagahapon sa kaadlawon.
Matud pa ni Fire Investigator nga si SFO1 Lowel Opolintisima nga nagsugod ang sunog sa kwarto ni Roberto Wong nga nag-abang sa balay ni Jose Castro.
Ang maong sunog miabot sa third alarm nga nakontrolar sa kabomberohan sa alas 4:49 sa kaadlawon apan miabot pa sa alas 9:16 sa buntag una kini hingpit napalong. Sumala pa ni Opolintisima nga namatay ang usa ka 5- anyos nga batang babaye nga si Maria Alexa Mutoc ug naangol ang unom ka tawo.
Ang mga naangol mao sila si Ednalyn Calisin, 28, Mary Irense Simbajon, 6, Matthew Justine Simbajon, 2, Ren Ren Mutoc, 3, igsuon sa namatay, Bernardo Ortiz, 53, ug ang bombero nga si FO3 Alexander Labuga. Matud pa ni Opolintisima nga wala diha sa balay ang inahan sa namatay nga bata nga si Flordeliza Mutoc kay naa kini sa iyang trabahoan.
Matud pa nga ang nag-abang sa silingan nga kwarto sa namatay ang mitabang sa duha ka anak ni Mutoc.
Sumala pa nga gipukaw ni Ortiz si Maria Alexa Mutoc ug giingnan nga mosunod niya ug iya sab nga gikugos ang manghod niini nga si Ren-Ren apan wala na makasunod si Maria Alexa tungod kay nagsugod na’g kahugno ang mga kahoy nga nangasunog ug gituohang natabunan niini ang bata.
Naluwas ni Ortiz si Ren Ren apan nakaangkon ang duha og grabing paso sa ilang lawas apan napaig sa sunog si Maria Alexa. Naugdaw gyud ang duha ka building sa maong sunog nga nakaapektar sa 18 ka pamilya o 91 ka mga tawo. Sagad sa nagpuyo sa maong balay mga trabahante ug estudyante nga nahinanok og katulog. Gibana-bana nga miabot og P400 mil ang danyos sa maong sunog. Mao na kini ang ika-upat nga sunog nga miigo sa Metro Cebu niining semanaha. (BANAT NEWS)