40 ka balay gilamoy sa sunog sa Brgy. Umapad, Mandaue City

CEBU, Philippines - Mokabat sa P300,000 ang gibanabanang danyos sa nahitabong sunog sa sitio Limonsito sa barangay Umapad, dakbayan sa Mandaue alas 5:30 ang takna kagahapon sa buntag nga nakontrolar sa paglabay sa 23- minutos.

Si FO1 Edizon Dapal sa kabomberohan sa maong dakbayan miingon nga ang sunog nagsugod sa sulod sa lawak sa panimalay nga gipanag-iya ni Elsa Manuel ug mitapon kini ngadto sa sikbit nga kabalayan.

Samtang napaso ang 21-anyos nga anak ni Manuel nga si John Michael nga giingong maoy giingong nagduwa-duwa sa trapo.

Kwarenta ka balay ang hingpit nga naugdaw ug tulo ang partially burned nga pulos ginama sa light materials nga nahimutang pipila lamang ka metros nga gilay-on sa barangay hall sa barangay Umapad.

Si Kapitan Nelson Rubio mipahimutang sa mga nasunogan sa gipabarog nga mga tolda sa bakanteng luna sa maong dapit.

Gipanghatagan na usab og pasiunang hinabang sa City Social Welfare Office ang mga nasunogan nga molungtad og tulo ka adlaw. (/EIM)(BANAT NEWS)