Kons. Cabahug ug Dabon nakasumiter og SOCE
CEBU, Philippines - Nahingangha sila si Konsehal Elstone Dabon ug Konsehal Editha Cabahug sa dakbayan sa Mandaue sa giingong wala sila makasumiter sa ilang Statement of Contribution and Expenditure (SOCE) busa pakanaugon sila sa katungdanan.
Si Konsehal Cabahug nga nahinabi sa Banat News miingon nga Hunyo 11 pa niining tuiga gisumiter niya ngadto sa Comelec office sa dakbayan sa Mandaue ang iyang SOCE.
Nakabayad usab siya og P7,250 nga buhis ngadto sa Bureau of Internal Revenue (BIR) sa iyang pagtunol og kopya sa maong SOCE nga didto niya ipaagi sa China Bank nga nahimutang usab sa Mandaue. Apan karong giapil siya sa listahan sa mga piniling opisyal nga pakanaugon sa katungdanan, mopadala siya og suwat ngadto sa Comelec.
Ipadala usab niya ang mga resibo niya nga gibayran sa iyang pagtunol niini ngadto sa Comelec Mandaue.
Samtang si Konsehal Dabon miingon nga Hunyo 13 usab siya nakasumitir sa iyang SOCE ug nakabayad siya og buhis nga mikabat og P8,097.87 ngadto sa BIR pinaagi gihapon sa China Bank.
Hinuon si Atty. Anna Fleur Gujilde nga maoy Comelec election officer mikompirmar nga si Konsehal Cabahug ug Dabon nakasumiter gayud sa ilang SOCE. (/WC)(BANAT NEWS)
- Latest
