8 pa ka buwan ang hingpit nga pagbangon sa Bantayan

CEBU, Philippines - Gibanabana nga molanat pa og  pito ngadto sa walo ka bulan gikan  karon  ang  hingpit nga pagbangon  sa industriya sa itlog  sa  lungsod  sa Bantayan, sa isla  sa Bantayan.

Mao  kini ang gibutyag  kagahapon ni Vince Escario  tigpamaba  sa kagamhanan  sa maong  lungsod kinsa  nagkanayon  nga sa mao  usab  nga  higayon  hingpit  na  usab  nga  mahibalik  ang hustong  kahayag  sa ilang  lugar.

Gibutyag ni  Escario  sa Banat News nga kaluha  ang  suga  sa   industriya  sa itlog  nga  maoy  kasagarang  patigayon  nga  milungtad  sa Bantayan  gawas  sa pangisda  ug  panguma  sa mga  molupyo.

Midugang  si  Escario  nga  4  lang  ka barangay  sa Bantayan  sa pagkakaron maoy  may  suga  sulod  sa tagduha  ka oras  matag  adlaw.

Kini mao ang  barangay  Poblacion, Bantigue, Binaobaw  ug  Suba.

Samtang  ang  mga  poultry raiser nagsugodsugod pa  sa pagtukod  sa ilang  mga  balay  paitloganan  sa manok  human  kini mahapay  ug  mangagusbat  atol  sa bagyong  Yolanda.

Nasuta  nga  ang mga  produkto  sa  itlog  sa manok  sa isla  sa Bantayan   gisuplay  sa tanang  panginahanglan  sa itlog  sa Kabisay-an  ug  Mindanao.

Sa pagkakaron  matud  pa  ni  Escario  nga  padayon pa ang  mga  molupyo  sa pagtukod  og hinayhinay  sa ilang  mga  balay uban  sa  mga  materyales  nga  hinatag  sa  kagamhanan sa lalawigan.

Matud  ni Escario  nga  mikabat  na  og  P2 milyones  cash  ang  nadawat  sa kagamhanan  sa Bantayan  gikan  sa Kapitolyo way  labot  sa mga  relief  goods.

Gikan  sa maong  kantidad  gikuha  ang  mga sin, semento ug kahoy  nga giapud-apod  sa  mga  molupyo  nga nawad-an  og  kabalayan. (BANAT NEWS)