CEBU, Philippines - Ang bag-ong napiling hepe sa mga traffic enforcer sa dakbayan sa Talisay moimplementar og demokratikong pagbadlong ngadto sa mga drayber nga magpabadlong.
Si Mario Zafra na-instolar kini sa katungdanan niadtong Disyembre 1, 2013 isip hepe sa mga enforcer sa City of Talisay-Traffic Operation Development Authority (CT-TODA).
Si Zafra nga nahinabi sa Banat News nagkanayon kini nga demokratikong pagbadlong ang buot niyang himuon sa mga enforcer ngadto sa mga drayber nga magpabadlong aron malikayan ang panagbangi. Gipasabot ni Zafra nga kung ang usa ka enforcer arogante nga mobadlong sa usa ka drayber dako kaayo ang kahigayonan nga makakita kini og away.
Matud ni Zafra nga pahimangnoan niya ang mga enforcer nga kinahanglan magbaton og taas nga pasensiya tungod kay dili malikayan nga dunay mga drayber usab nga arogante ug kung dili kini madala og hinay nga badlong mas maayo nga motawag na lang og polis aron kini masikop.
Hinuon gipasalig ni Zafra nga disiplinahon niya ang iyang mga sakop aron walay mag-abusar ug ang uban mangilkil.
Gibutyag ni Zafra nga sa pagkakaron dili pa sila makaisyu og citation ticket tungod kay wala pa mapaubos sa seminar ang ilang mga enforcer gawas niini ang letter head sa ilang citation ticket ilisanan pa tungod kay ang nakabutang “TRAFCOM o Traffic Commission dili CT-TODA.
Dugang ni Zafra nga naghuwat na lang siya sa ilang labaw kung kanus-a ipaubos sa seminar ang mga personnel sa CT-TODA. Si Bise Mayor Romeo Villarante maoy chairman sa CT-TODA. (/EIM)(BANAT NEWS)