Mga senior citizens dili pa sigurado nga makadawat sa ilang tag P4mil

CEBU, Philippines - Dili pa sigurado kung mahatagan ang tanang senior citizens dinhi sa dakbayan sa Sugbo sa ilang gipaabot nga tag P4,000 tungod sa kanihit sa kwarta sa panudlanan sa dakbayan.

Si Mayor Michael Rama miingon nga pakigtagboan pa niya sila si City Treasurer Diwa Cuevas ug City Administrator Jose Marie Poblete aron pagsuta kun pila ang kwarta sa panudlanan nga magamit para sa mga senior citizens.

Kun hutdan og hatag ang kapin sa 60,000 ka senior citizens sa ilang tag P4,000 nga nahabiling cash assistance, ang dakbayan sa Sugbo mogasto og kapin sa P240 milyones.

Ang kwarta sa bangko sa dakbayan sa miaging Nobiyembre 25, aduna pa’y mga P1 bilyon apan ang uban dili na magamit sa pagpanghatag og cash assistance sa mga senior.

Ang dako nga bahin gitagana alang sa Trust Fund nga gamiton lang sa iyang katuyoan, dunay alang sa Special Education Fund (SEF) nga gastohon ra para itukod ug sa pagpaayo sa mga tunghaan. Ang cash flow report gikan sa City Treasurer’s Office nagpakita nga P430 milyones ang anaa sa General Fund nga maoy mahimong magamit alang sa pangbayad sama sa cash assistance sa mga senior. Apan sa P430 milyones, ang P165 milyones niini dili usab magamit tungod kay gibutang kini sa lima ka tuig nga Time Deposit nga unya pa mapupos sa 2016.

Nagpasabot nga ang P265 milyones na lang maoy mahimong kakuhaan og pangbayad para sa mga senior.

Usa ka opisyal sa City Hall nagkanayon nga kun hutdan pagbayad ang P240 milyones para sa mga senior P15 milyones na lang ang mahabilin ug dili na gani paigo sa pagpasweldo sa mga kawani. Gawas sa bayranan sa mga senior citizens, duna pa’y ubang obligasyon ang dakbayan sama sa cash assistance sa 11,000 kapin ka Persons With Disabilities (PWD), dugang honorarium sa mga opisyal sa kabarangayan ug daghan pa nga mga bayranan.  (BANAT NEWS)