CEBU, Philippines - Ang partido sa Alayon sa dakbayan sa Talisay nagpabilin pa gihapon kining lig-on matud ni Talisay City Councilor Doroteo Emit.
Si Emit kaniadto kaalyado sa Liberal Party apan mitapon kini sa Alayon mibutyag nga dunay konsehal nga taga LP ang miimbitar kaniyang pabalikon siya sa grupo.
Gibutyag ni Emit nga niadtong tuig 2007 siya maoy napiling kapitan sa ilang barangay sa Pooc apan pagkahuman sa national elections sa Mayo mitapon si Emit sa Alayon ug napili usab kining konsehal sa siyudad.
Apan gipasabot sa konsehal nga bisan unsa pay political affiliation sa usa ka opisyal ang importante mao ang makahatag og kaayohan ngadto sa katawhan.
Matud ni Emit nga gihatagan niya og higayon ang Alayon sa imbitasyon niini nga motapon siya ngadto sa grupo ug sa mao niyang pagtapon ang taga Pooc nakapahimulos usab kini sa kaayohan nga gihatag sa Alayon ngadto kaniya.
Matud ni Emit di katuohan ang mga report nga daghang motapon kanila ngadto sa LP.
Sa laing bahin, si Konsehal Danny Caballero sa LP nga nahinabi sa Banat News kagahapon nagkanayon kini nga wala pa sila makadawat og mga final declaration gikan sa ubang mga kapitan sa kabarangayan sa Talisay lakip na sa ubang mga opisyal sa siyudad nga motapon na sila sa LP.
Hinuon matud ni Caballero nga ang political affiliation sa usa ka opisyal dili maoy barometro sa paghatag og serbisyo ngadto sa katawhan. (BANAT NEWS)