CEBU, Philippines - Bala nga milapos sa likud gikan sa dughan ang namatyan sa usa ka manghimoay og longanisa nga gipusil sa iyang silingan didto sa Godinez Compound, Hi-way 77, Cadajo-an, barangay Talamban dakbayan sa Sugbo alas 6:00 sa buntag gahapon.
Ang napusilan patay naila nga si Ervin Mession alyas “Awingâ€, 40, nagpuyo sa naasoy’ng lugar.
Samtang ang suspetsado mao usab si Jimy Mauro, 30, manghimoay og longanisa, nga taga barangay Lorega San Miguel, dakbayan sa Sugbo.
Base sa imbistigasyon nga gihimo nila ni PO2 Nilo Aventurado ug SPO4 Rey Cuyos sa Homicide Section sa Cebu City Police Office nga ang biktima naabtan nila nga nag-ubo sa dalan sa maong lugar nga may samad-pinusilan sa walang bahin sa iyang dughan ug bukobuko.
Matud pa ni Julio R. Bacalso, 57, molupyo sa maong lugar, nga niadtong Disyembre 3, alas 11:30 sa buntag ang biktima ug ang suspetsado nag-away sulod sa compound.
Mitug-an siya ngadto sa kapolisan nga gisumbag sa biktima ang suspetsado, busa gibaharan kini sa suspetsado nga “karon ra ka kutobâ€.
Si SPO4 Rey Cuyos, nahinabi sa Banat News, miingon nga magkaila ang biktima ug ang suspetsado.
Sumala pa ni Cuyos, ang motibo sa maong hitabo mao ang panag-away sa ilang mga ka-live-in partner sa wala pa masuta nga isyu.
Matud pa ni PO2 Nilo Aventurado, nga gipaabot pa nila ang desisyon sa asawa sa biktima kung mopasaka ba kini og kaso batok sa suspetsado.
Nakuha usab sa Crime Scene Investigation Unit, CCPO responding officer PO2 Darryl Velasco ug mga kauban niini, ang pitaka sa biktima nga aduna’y sulod nga P650.00 ug mga nagkalain-laing I.D.
Padayon pang gipangita sa kapolisan ang suspetsado human kini moikyas. (BANAT NEWS)