CEBU, Philippines - Ang Police Regional Office (PRO)-7 nipaalerto ang kinatibuk-ang fuerza niini sa Central Visayas sa unang kaadlawon sa pagsugod sa misa sa de gallo unya sa Disyembre 16 hangtud na sa adlaw sa kasaulogan sa Pasko.
Sigun pa ni PRO-7 Regional Director Chief Supt. Danilo Constantino nga monitoron sa kapolisan sa tungatungang Kabisay-an ang mga lugar nga sagad dagsaan sa bagang duot sa katawhan sama sa simbahan. Laing lugar nga hugtan sa pag-monitor sa kapolisan mao ang mga pantalan, terminal ug ingon man ang mga dagkong mga tindahan aron kahatagan og tukmang seguridad ang katawhan. Gipasabot ni Constantino nga ila usab nga ipatuman ang police visibility sa nagkadaiyang mga lugar nga sagad mahitabo ang mga nagkadaiyang krimin aron masanta ang mga dautang elemento ilabina sa mga tulisan nga sagad mudagsa sa Sugbo panahon na sa Pasko. (/WC)(BANAT NEWS)