CEBU, Philippines - Gibuksan kagahapon sa mga sakop sa Mandaue Chamber of Commerce and Industry (MCCI) ug mga membro sa urban poor ang Christmas Bazaar.
Kini pinaagi sa pagpahimutang og mga stall alang sa ilang mga produkto nga gibaligya sa ubos nga presyo.
Ang mga tolda nga maoy nagsilbing tindahan anaa ipahimutang sa atubangan sa City Hall sa barangay Centro sa maong dakbayan.
Nagsugod sa pagladlad sa ilang mga baligya niadtong Disyembre 3 ug magpabilin sila hangtud sa Disyembre 26 niining tuiga.
Si Philip Tan nga maoy presidente sa MCCI ug mga kaubanan nga magpapatigayon sa maong dakbayan maoy nangulo sa pagbukas kagahapon nga gitambongan usab sa mga opisyal sa kagamhanan nga gipangulohan ni Mayor Jonas Cortes. (Romeo T. Limpangog/WC)
Kawani sa BOC-Cebu wa apektohi sa pag-resign ni Biazon
Nagpadayon sa ilang naandang gimbuhaton ang mga kawani ug opisyal sa Bureau of Customs-Cebu nga wala apektohi sa pag-resign ni Commissioner Ruzzano Rufino "Ruffy" Biazon.
Giingon nga igo lang silang nakurat human hisayri nga mi-resign ang ilang amo, apan nagpadayon sila sa ilang mga trabaho adlaw-adlaw
Matud pa ni Customs Port of Cebu District Collector Ret. Brig. Gen. Roberto Almadin nga bag-o pa lamang siya sa bureau hinungdan nga wala siya masinati sa mga nahimo ni Biazon alang sa aduana.
Samtang si Atty. Paul Alcazaren ang Sub Port of Mactan Collector wala mohatag sa iyang panahom sa pagluwat ni Biazon sa katungdanan.
Apan nagkanayon si Alcazaren nga padayon lamang sila sa ilang trabaho ilabi na nga ang Sub Port sa Mactan maoy nag-atiman sa mga nangabot nga mga relief goods ug mga ekipos nga gikan sa gawas sa nasud. (/WC)(BANAT NEWS)